Vissirðu að kamilla er öflugur rakagjafi?

Kamilla er einstaklega góð jurt fyrir þurra húð því hún er öflugur rakagjafi ásamt því að róa húðina. Hún hefur bólgueyðandi áhrif og viðheldur langvarandi raka í húðinni. Kamillute er vel þekkt enda hefur kamilla verið notuð sem lækningajurt frá örófi alda.

Kamilla vex ekki villt hérlendis og er ekki algeng í görðum. Ég kaupi hágæða lífrænt vottaða kamillu erlendis frá sem ég nota bæði í ráðgjöfinni hjá mér og í margar vörur. Mín reynsla er sú að kamilla er frábær fyrir húðina en ég nota kamillute í öll kremin mín.

• Latneskt heiti: Matricaria recutita.
• Nýttir hlutar: blóm.
• Áhrif: bólgueyðandi, róandi, vöðvaslakandi, græðandi, vindeyðandi, dregur úr ofnæmi.
• Notkun: græðir sár, húðsjúkdómar, svefnleysi, stress, brjóstsviði, uppþemba, magaverkir, magabólga og sár, meltingartruflanir, ristilkrampi, vindverkir, iðrabólga, Crohn’s, vöðvabólga, túrverkir, frjókornaofnæmi, astmi, exem.

Kamilla er öflug bólgueyðandi jurt og er því sérstaklega góð gegn roða og bólgum í húð. Hún róar húðina ásamt því að auka teygjanleika hennar og raka. Það er því engin tilviljun að ég nota kamillu í öll rakakremin mín.

Hún er ekki bara róandi og rakagefandi heldur líka græðandi. Kamilla er einstaklega góð til að draga úr kláða og græða sár, exem, brunasár, bleiuútbrot, sárar geirvörtur og frunsur.

Kamilla er sennilega sú jurt sem er hvað vinsælust á Vesturlöndum fyrir róandi og slakandi áhrif. Hún róar taugakerfið, eykur slökun og dregur úr magaverkjum, sérstaklega ef þeir eru tengdir kvíða. Kamilla er einnig frábær jurt fyrir börn sem þjást af magaverkjum, svefnleysi, stressi og kvíða. Ég nota kamillute gjarnan við brjóstsviða, magabólgum og svefnleysi í ráðgjöfinni hjá mér.