Bólur? Þá er blóðberg lausnin

Blóðberg er einstaklega góð náttúruleg lausn gegn bólum ásamt því að hafa góð áhrif á heilsuna. Það er náskylt garðablóðbergi T. vulgaris, öðru nafni timjan, sem á sér afar langa sögu sem lækninga- og kryddjurt. Garðablóðberg hefur verið rannsakað mjög mikið og m.a. sýnt jákvæða virkni gegn bólum. Virkni blóðbergs og garðablóðbergs þykir mjög svipuð, en blóðberg hefur alla tíð verið vinsæl te- og kryddjurt hérlendis.

Mér finnst sérstaklega gaman að vinna með ferskt blóðberg því lyktin er svo góð. Ég bý til tinktúru (jurtir í alkóhóli) úr fersku blóðbergi sem þýðir að ég legg blóðberg í alkóhól sama dag og ég tíni það. Ég tíni sjálf allar íslensku jurtirnar sem ég nota í vörurnar mínar. Síðan blanda ég blóðbergstinktúrunni við vallhumal og morgunfrú svo úr verður bóluhreinsirinn sem er langvinsælasta varan mín.

• Latneskt heiti: Thymus praecox.
• Nýttir hlutar: blöð og blóm.
• Áhrif: bakteríu- og sveppadrepandi, græðandi, bólgueyðandi, krampastillandi, verk- og vindeyðandi, hóstastillandi, slímlosandi, vatnslosandi, örvar tíðablæðingar.
• Notkun: bólur, sár, kvef og flensa, hálsbólga, hósti, astmi, bronkítis, eyrnabólga, tannholdsbólga, ristilkrampi, uppþemba, túrverkir, vöðvabólga.

Blóðberg hefur sterk bakteríu- og sveppadrepandi áhrif ásamt því að vera bólgueyðandi, allt eru þetta áhrif sem eru sérstaklega góð til að draga úr bólum og fílapenslum. Rannsóknir á garðablóðbergi sem er náskylt blóðbergi hafa sýnt fram á að það dregur meira úr bólum en stöðluð kemísk bólukrem. Ég nota bæði tinktúru úr fersku blóðbergi og garðablóðbergi í bóluhreinsinn minn en þúsundir íslendinga hafa haft góða reynslu af honum í meira en áratug.

Blóðberg hefur öldum saman verið notað til að vinna bug á kvefi, flensu, hálsbólgu, hósta, astma og berkjubólgu. Það bæði losar um slím í öndunarvegi og þurrkar það upp og er því líka gott við stíflum í nefi og ennisholubólgum og er að auki notað við eyrnabólgum, bæði til áburðar og inntöku. Það þykir líka gott sem skol við tannholds- og hálsbólgu og útvortis til að græða og sótthreinsa sár.

Það er áhrifaríkt við magakveisum, vindgangi og uppþembu og hefur jafnframt verið notað sem ormahreinsandi. Ég nota það sérstaklega í blöndur gegn uppþembu og vindgangi í ráðgjöfinni hjá mér.

Blóðberg þykir gott við túrverkjum, seinkun á blæðingum og útvortis gegn bólgum í brjóstum, útferð og sveppasýkingu í leggöngum.

„Þessi jurt hefur ágætan kraft til að styrkja sinar. Hverslags vín, sem á þessari jurt hefur staðið nokkra stund og síðan drukkið, læknar sinadrátt, það sama læknar og kvef, hreinsar og styrkir höfuð, þynnir blóð, læknar uppþembing og harðlífi þeirra manna, sem etið hafa mikið af hörðum mat. Það vermir kaldan maga og styrkir hann. Dúkur, í þessu víni vættur, og við lagður höfuð manns, bætir öngvit og svima, höfuðverk og hettusótt. Seyði af þessari jurt, sem te brúkað, er gott við hósta, læknar ölsýki þeirra manna, að morgni drukkið, sem ofbrúkað höfðu vín að kvöldi. Það sama örvar svita og er gott brjóstveikum mönnum. […] Blóðberg, marið og lagt við gagnaugu, eyðir höfuðverk og bætir svefnleysi.“ – Björn Halldórsson, Grasnytjar 1783

Nokkrar rannsóknir hafa verið gerðar í tilraunaglasi þar sem sýnt hefur verið fram á andoxunaráhrif blóðbergs^1-4 og það drepur einnig Bacillus subtilis, Staphylococcus aureus og fleiri bakteríur^5,6 auk þess sem það er skordýraeyðandi.⁷ Bakteríudrepandi áhrif blóðbergs komu einnig í ljós í rannsókn á geymsluþoli ferskfisks. Ferskur fiskur sem geymdur var á ís með blóðbergi, í stað íss úr vatni eingöngu, reyndist hafa um 15–20 dögum lengra geymsluþol.⁸

Ég mæli ekki með notkun blóðbergs á meðgöngu.