Project Description
Ég bjó þessa uppskrift á sínum tíma til fyrir sjúklinga í ráðgjöf hjá mér vegna glútenóþols, en kínóa er glútenlaust og afar próteinríkt. Það leið þó ekki á löngu þar til ég var farin að elda hann sjálf á hverjum degi enda frábær leið til að nýta berin í frystinum. Fyrir mér er mikilvægt að hafa sem minnst fyrir morgunmatnum á virkum dögum og þessi grautur er bæði fljóteldaður og inniheldur fá hráefni. Ég set enga mjólk út á grautinn en á þó til að hafa rjóma með honum á sunnudögum, enda breytist hann við það í ljúffengan eftirrétt.
4 msk. heil kínóafræ
1/2-1 tsk. kanill
3 dl vatn
1 dl íslensk bláber (eða 1/2 dl af gojiberjum)
1/2-1 tsk. ósaltað smjör
1/-1 tsk. lífrænt hunang
sjávarsalt
Setjið kínóafræ og vatn í skál og látið liggja í bleyti yfir nótt. Setjið vatn, kanil, salt og kínóafræ í pott og sjóðið í 10–15 mínútur á lágum hita án loks, þar til fræin eru alveg soðin. Bætið síðan frosnum eða ferskum bláberjum út í og hitið í stutta stund. Setjið hann þá í skál og hrærið smjörklípu og hunangi saman við. Ef gojiber eru notuð í stað bláberja er betra að leggja þau í bleyti yfir nóttina með kínóafræjunum.